ROXAS CITY – Wala napunggan sang isa ka pasahero nga ipa-utwas sa social media ang iya pagkadismaya matapos ginaalegar ginpamalibaran ini sang konduktor sang Ceres nagabiyahe pa Estancia nga makasakay bangud sa dala sini nga ido.
Sa pagpakig-angut sang Bombo Radyo sa indi na paghingadlan nga pasahero nagikan ini sa Iloilo kag nagpanaug sa Roxas City Integrated Transport Terminal (RCITT) dala ang 4 ka bag kag ido.
Suno diri, nagpila ini sa Ceres nagabiyahe Estancia humalin alas-5:00 kag nakasaka pasado 6:30.
Wala ini nagalaum nga samtang nagapungko na, palapitan ini sang konduktor kag ginpapanaug bangud sa dala sini nga ido.
Pag-eksplekar sang konduktor bawal ang ido sa bus kag kun luyag sang pasahero sa iban na lang magsakay.
Dismayado naman ang pasahero bangud sa kahabaon sang pila subong palang ini ginhambal sang konduktor kun sa diin nakasakay na siya kag nakapwesto.
Katingalahan man sa nasambit nga pasahero kun ngaman ginbawalan siya sang konduktor bangud ceres man ang iya ginsakyan nagikan sa Iloilo kag wala man ini ginbawal.
Mahibaluan ang ginahuptan nga ido sang pasahero ang naka-diaper na.
Sa karon, luyag sang tagreklamo nga maklaruhan kun ginadumilian gidman bala ang pagsakay sang ido sa isa ka regular bus.
