ROXAS CITY – Indi madula ang pangduha-duha nga mapaslawan liwat nga makapasar sa Social Worker Licensure Board Examination ilabi na sa ika-duha nga kahigayunan ang Board passer nga si Heaven Glor Viente.
Sa interview sang Bombo Radyo kay Viente, ginpahayag sini nga indi siya makapati nga nakapasar siya sa ika-duha nga kahigayunan bangud sa iya pag-ako tuman ka budlay ang amu nga exam.
Mahibaluan nga tumandok si Viente sang Poblacion Pilar kag nagradwar sa kurso nga Bachelor of Science in Social Work sa Capiz State University Pilar Campus.
Suno kay Viente, una sini niya nga gintun-an nga kurso amu ang Bachelor of Science in Information Technology (BSIT) apang nagpangibabaw sa gihapon ang iya kagustuhan nga makabulig sa mga tawo nga nagakinahanglan rason nga nagsaylo ini sang kurso nga social work.
Sa bulig man sang iya pamilya kag suporta, natapos sini niya ang iya pag-eskwela kag nagpasimpalad nga magkuha sang board exam sa una nga beses apang napaslawan ini.
Apisar masakit kag nakabatyag sang disappoint sa kaugalingon, liwat siya suno diri nga nagbangon kag nagtimakas nga magtuon agud magkuha liwat sang amu nga exam.
Mensahe ni Viente sa kaangay sini nga estudyante, indi madulaan sang paglaum kag magsalig lamang sa ginuo bangud wala sang imposible sa iya.
