All set na ang Passi City sa pag-host sang Western Visayas Regional Athletic Association (WVRAA) Meet 2026 nga magasugod sa Marso 17 tubtob Marso 23.
Sa interview sang Bombo Radyo kay Passi City Mayor Atty. Stephen Palmares, iya ginpahayag nga plastado na ang mga preparasyon sang syudad para sa nasambit nga sporting event.
Suno sa alkalde, handa na ang security protocol kag may gin-deploy nga dugang nga kapulisan bilang augmentation para masiguro ang kalinong kag seguridad sang mga delegado kag mga ginikanan.
Dugang pa sang alkade, may yara man nga naka-standby nga emergency responders sa tagsa ka mga sporting events.
May ginpatuman man nga traffic management plan agud masiguro nga mangin hilway ang dalagan sang trapiko sa syudad.
Nahibaluan nga may walo ka delegasyon ang magapartisipar sa palaro lakip na ang Guimaras, Capiz, Aklan, Antique, Roxas City, Iloilo City, Passi City kag Iloilo Province.
