ROXAS CITY – Wala napunggan ni Pastor Russel Monton Ban, bana sang nagtaliwan nga si Punong Barangay Lorilee Aguirre sang Barangay 5, sining syudad ngA mangin emosyunal samtang ginsaysay sa Bombo Radyo ang inagihan sang ila pamilya sang makumpirma nga positibo sa COVID-19 ang asawa.
Sa exclusive interview sang Bombo Radyo kay Pastor Ban, ginpahayag sini nga wala sang tuman ka sakit nga makita ang imo asawa nga yara na sa critical stage kag nagapakigbato sa iya kabuhi.
Sa pihak nga nagpositibo sa COVID-19 ang asawa, nagpabilin ini sa luyo ni Kap. Aguirre kag nagpirma lamang sang waiver nga wala sang salabton ang ospital ukon medical workers anuman ang madangatan sini.
Suno kay Pastor Ban nadesisyunan sini nga updan sa isolation room ang asawa sa pihak sang risgo nga dala sang nasambit nga sakit bangud luyag sini ipabatyag kay Kapitan Aguirre nga indi niya ini pagbayaan kag unungan niya ini tobtob sa katapusan sang iya kabuhi kasubong sang ila ginpromesa sa isa kag isa nga maga-updanay sila sa kalipay kag kasakit.
Sa amo nga pamaagi mapalab-ot sini ang undying love sa asawa.
Ginlaragway ni Pastor Ban ang asawa nga strong kag compassionate person bangud sa pihak nga nagalain na ang iya pamatyag, ang kapakanan sang iban nga tawo partikular sang mga BHWs kag tanod sag Barangay 5 ang iya gina-ulikdan.
Mayo 21, 2021 sang aga nagamuno na ang asawa nga indi na niya masarangan ang nabatyagan tobtob gindala ini pagkahapon sa ospital sa diin nagsiling ang doktor nga may COVID-19 ang pasyente nga ginsegundahan sang nagguha ang swab test result.
Samtang nadesisyunan sang pamilya nga ilubong si Kap. LA sa baylo nga i-cremate.
Sa karon naka-home quarantine si Pastor Ban sa ila puluy-an kag ginpaidalum na ini sa swab test.
