Isa ka Italyano nga musikero nga ginaoperahan sa utok ang nagtokar sang saxophone sa bug-os niya nga siyam ka oras nga operasyon!
Suno sa isa ka press release gikan sa Paideia International Hospital, ang 35-anyos nga pasyente kinahanglan nga magbugtaw sa bug-os nga operasyon agud masiguro sang iya mga doktor nga wala sang neurological function nga nahalitan samtang ginakuha ang isa ka tumor sa iya utok.
Suno sa isa ka interview sa neurosurgeon kag lider sang operasyon nga si Dr. Christian Brogna, nagsiling sia nga sa bulig sang awake surgery, makahatag ini sing tuman nga katukma samtang naga-opera sa pasyente kag agod wala sing neuronal networks nga nagagiya sa nagkalainlain nga mga hilikuton sang utok pareho sang paghambal, paghulag, pag-isip kag memorya ang maapektuhan.
Antes sang operasyon, ang pasyente, nga ginbutang sa idalom sang alyas nga “GZ”, nagsambit kay Dr. Brogna nga isa siya ka maayo nga manugtukar sang saxophone. Ginpahayag niya nga indi niya luyag nga maapektuhan ang iya mga ikasarang sa musika pagkatapos sang operasyon sa utok. Bangud sini, ginpangabay sang mga doktor si GZ nga magtukar siya sa tion sang operasyon.
Sa sulod sang 9 ka oras, ginpatukar ni GZ ang tema nga ambahanon sang pelikula nga “Love Story” kag ang pungsodnon nga ambahanon sang Italya nga “Il Canto degli Italiani”. Daku ang nabulig sang iya pagtukar bangud nakita sang mga doktor ang nagkalain-lain nga functions sang utok sa tion sang operasyon.
Ang tumor sa utok ni GZ madinalag-on nga nakuha kag Madasig ini nga nakaguwa sa amo nga ospital.
