ROXAS CITY – Dead on arrival sa Bailan District Hospital ang anay Barangay Kapitan matapos nga ginluthang sang duwa ka indi pa makilan-an nga suspetsado sa Brgy. Sto Niño, banwa sang President Roxas.
Ginkilala ang biktima nga si Nelson Alayon Daluyo, 63-anyos kag residente sang Purok Malipayon, Brgy. Bayuyan sang nasambit nga banwa.
Sandig sa inisyal nga imbestigasyon sang President Roxas Municipal Police Station, nga samtang nagamaneho ang biktima sang iya motorsiklo nga Suzuki Sky Drive Sports nagaduag grey nagikan sa Pres. Roxas proper padulong sa Brgy. Bayuyan sa diin naglabay ini sa Brgy. Sto Niño kag hinali nalang nga ginluthang sa likod nga porsyon sang iya ulo sang isa sa mga suspetsado nga nagasakay sa motorsiklo nga Honda TMX nagaduag pula.
Ginapahayag nga ang duwa ka suspetsado ang lunsay nagasuksok sang itom nga jacket, ang driver ang nagasuksok sang helmet samtang ang back rider sini ang nagasuksok sang bonnet.
Madasig naman nga ginpadangat sa ospital ang biktima apang ini ang ginbawian gid sang kabuhi.
Samtang, madasig naman nga nakapalagyo ang mga suspetsado.
Padayon ang hot pursuit operation sang mga kapulisan sa duwa ka suspetsado kag nagapadayon man ang paghibalo kun ano ang motibo sa pagpangluthang.
Sa karun, yara na ang bangkay sang biktima sa isa ka punerarya sa nasambit nga banwa.
