ROXAS CITY – Posible nga malampuwasan ni Apollo Carreon Quiboloy ang mga kaso nga ginpasaka batuk sa iya. Ini ang ginpahayag ni Atty. Nelson Borja, Criminal Lawyer sang ma-interview sang Bombo Radyo Roxas.
Suno diri nga nakadepende na sa abogado ni Quiboloy, kun anu nga mga tikang ang iya pagagamiton agud nga malumpuwasan ang mga kaso nga conspiracy to engage in sex trafficking by force, fraud and coercion, sex trafficking of children, marriage fraud, fraud and misuse of visas, bulk cash smuggling, promotional money laundering, concealment money laundering kag international promotional money laundering. Apang kun siya lamang ang pamangkuton may yara pa nga mga pamaagi kag ini isa ka confidential nga butang nga siya lamang ang nakahibalo.
Ginpat-pat man ni Borja nga ang extradition isa ka kontrata nga obligasyon sang United States of America (USA) kag sang Pilipinas agud ma-transfer ang isa ka indibidwal nga akusado vice-versa.
Dugang pa ni Borja nga kinahanglan magpadala sang request ang gobyerno sang Amerika sa Pilipinas pamaagi sa Department of Justice (DOJ) kag ini ang maga-asekaso kun may yara sang basehan ang request for extradition sang nasambit nga pungsod.
Kun ini ang mahibaluan nga may yara sang basehan ang Department of Justice (DOJ) maga-file sang petisyon sa Metropolitan Trial Court ini ang isa sa mga tikang suno sa iya nga kinahanglan sundon.
