Magatan-ay ang state-run Land Bank of the Philippines sang bulig pinansiyal pinaagi sa loans sa mga negosyo kag indibidwal nga gin-igo ni Severe Tropical Storm Kristine.
Sa isa ka advisory, ginpahayag sang LandBank nga ang Community Assistance and Reintegration Support Plus (CARES Plus) sini ang mangin available sa mga mangunguma, manugpangisda, kooperatiba, micro, small, and medium enterprises (MSMEs), dalagkuan nga korporasyon kag electric distribution utilities.
Sa idalom sang programa, mahimo nga gamiton sang eligible borrower ang pondo para sa working capital, capital expenditures kag konstruksiyon, pagkaayo ukon acquisition sang disaster-damaged equipment, facilities kag structures.
Mahimo man nga gamiton sang electric distribution utilities ang loan bilang short-term working capital.
Ang mga government employee kag payroll holder sa LandBank ang makaangkon sang madasig nga access sa pondo pinaagi sa Electronic Salary Loan (ESL) nga mahimo nga ma-avail sa pakig-anut sa human resource department ukon pinaagi sa mga branch sang LandBank.
Ang mga LandBank credit card holder ang pahanugutan man nga i-convert ang ila nga available credit limits sa emergency cash nga may flexible repayment options nga tubtob 36 ka bulan pinaagi sa “EasyCash for Emergencies” feature.
Ang LandBank ang may mandato nga iduso ang countryside development samtang nagapabilin nga financially viable.
Ginapatuman sini ang comprehensive agrarian reform program (CARP) nga nagatan-ay sang bulig sa magagmay nga mangunguma kag manugpangisda kag nagaserbi nga official depository sang pondo sang gobyerno.
Gintapos sang bangko ang 2023 bilang second-largest lender sang pungsod nga may P3.270-trillion nga balor sang assets, kasunod sang BDO Unibank Inc. nga may P4.283 trillion.
