ROXAS CITY – Patay na sang nasapwan sang pila ka mga residente ang isa ka pawikan sa Sitio Nipa, Barangay Culasi, Roxas City.
Sa pakig-angut sang Bombo Radyo kay Ronilo Combate, City Fisheries and Aquatic Resource Management Council (FARMC) Chairman kag presidente sang Nipa Small Fishermen Association (NASPA), suno diri nga nagapanimaho na ang nasambit nga pawikan kag posible nga nasangit sa lambat sang pila ka mangingisda kag wala gilayon madiparahan.
Yara sa 39 inches ang kahabaon, 23 inches ang kalaparon kag ginabulubanta 30 kilos ang kabug-aton sang pawikan.
Ginpakamaayo na lang Combate kaupod ang mga opisyal sang Brgy kag katapo sang Philippine Coast Guard (PCG) nga ilubong ang amu nga pawikan.
Ginpahayag man sini nga ordinaryo na sa ila nga may masapwan sila nga mga endangered species kaangay sang pawikan, dolphin butanding kag iban pa.
Dugang pa sang opisyal nga tuman ang halit sa kadagatan ilabi na sa mga endangered species sang mga palutang nga ginagamit sang mga mangingisda.
Nagapangabay si Combate sa gobyerno nga pasangkaron, striktuhon, hatagan sang aksyon kag penalidad ang mga tawo nga naga-abuso sa aton dunang manggad.
