ROXAS CITY – Ginpatigayon sang opisina ni 1st District Board Member Jose Fulgencio Pepe del Rosario kaupod ang Pinuno Partylist, ang duha ka adlaw nga pay-out sang 3rd batch sang mga estudyante sa idalum sang educational assistance program sa Barangay Bago kag Mongpong, Roxas City.
Sa interview sang Bombo Radyo kay del Rosario, yara sa 2,000 ka mga estudyante ang nagbaton sang tig-P2,000 bilang bulig pinansyal sa ila pag-eskwela.
Suno kay del Rosario, yara sa 8,000 ang kabug-usan nga benepisaryo sang Educational Assistance Program ni Pinuno Partylist Representative Howard Guinto, kun sa diin 6,000 na ang malipayon nga nakabaton.
Aminado si board member nga madamo pa sang nagahulat agud malakip sa listahan, gani gina-amat-amatan na sini nga madugang ang pondo agud madamo ang estudyante ang maka-agum diri.
Mahibaluan nga ang nasambit nga programa ang may pondo nga P16 million.
Samtang, natalana naman sa bulan sang Agosto ang pay-out para sa batch 4.
