ROXAS CITY – Nagapangabay si Punong Barangay Reynaldo Alparaque sang Barangay Cogon, Roxas City sa lokal nga gobyerno nga kun tani mapamatian ang hiligut-anon sang ila mga residente angut sa pagpanukot sa ila gina-agyan.
Sa interview sang Bombo Radyo kay Alparaque, ginpahayag sini nga liwat naman nga nagpanukot ang tag-iya sang duta nga si Lolito Cerelos sa mga motorista nga naga-agi sa amu nga alagyan.
Suno sa Punong Barangay nga dako na ang P10.00 para sa ila mga residente nga ila ginabayad sa tion nga mag-agi sila.
Mahibaluan nga gina-agyan na sang pumuluyo sa sulod sang 30 katuig ang amu nga dalan.
Pahayag sini nga ginpalab-ot naman nila ang amu nga problema kay Roxas City Mayor Ronnie Dadivas kag nagahulat na lamang sila sang sabat sang alkalde.
Angut sini, ginpanugyanan man ni Alparaque ang Punta Tabuc nga magpapasar sang resolusyon agud madasig ini nga masabat kag mahatagan sang solusyon bangud kun siya lamang suno diri indi ini matigayon.
Nagalaum man ini nga matapos na amu nga problema sa ila barangay.
