ROXAS CITY – Ginka-alarma ni Punong Barangay Manuel ‘Bongbong’ Aninang sang Barangay Olotayan, ang ginhimo nga pagpangbastos sa relihiyong Katoliko matapos nga ginpangwasak kag ginpangsunog sang lima ka mga indibidwal kaupod ang anay suldado ang pila ka mga rebulto kag imahe sang santos sa ila barangay.
Mahibaluan nga sa 17-anyos nga pagpungko ni PB Aninang bilang amay sang ila barangay ini ang una nga bes nga may natabo nga kaangay sini sa ila lugar kung sa diin tuman siya nga nasakitan.
Sa interview sang Bombo Radyo kay PB Aninang, ginsiling sini nga nag-abot sa ila lugar ang lima ka mga indibidwal sadtong Dominggo kag sa iya ihibalo nga magapamista lamang ang mga ini kag wala man nagtuad kung anu ang ila nga tuyo sa lugar.
Lipod sa ihibalo ni Aninang nga pagka-aga Lunes, nagsugod na ang mga ini sa pagpangbulong kag kalakip diri ang pagganyat sa mga nagapabulong nga i-surrender ang ila mga rebulto sang santos, bibliya, kag mga rosarito sa ila puluy-an agud dalayon ang mga ini nga maga-ayo sa ila sakit.
Kabaylo man sini ang pagsukot sa ila sang P200.00 kada isa bilang bayad.
Bangud malayo sa syudad, madamo nga mga pumuluyo nga may mga ginabatyag ang nagpasimpalad kag nagpabulong sa ila kung sa diin yara sa masobra 30 ka mga indibidwal ang ila ginapahayag nga nabulong pinaagi sa pagbanyos sang lana nga ila gindala.
Gilayon man ini nga nakalab-ot kay PB Aninang kung sa diin gilayon niya ini nga ginpadulungan kag ginpamangkot kung ngaman kinahanglan nga pangwaskon kag sunugon ang mga rebulto kag imahe bangud bilang isa ka Katoliko isa ini ka pagpangbastos.
Base sa mga ini wala sila sang relihiyon nga ginapatigan bangud ginsugo lamang sila sang langit.
Bangud madamo sang tawo sa lugar, mas ginpakamaayo sang nasambit nga Punong Barangay nga imbitahon na lamang sila nga magpadulong sa munisipyo agud didto hinalaan ang nasambit nga butang.
Ginpahayag man ni PB Aninang nga malain kag masakit lamang para sa iya bilang amay sang barangay nga wala nagpangayo ukon naghinyo sang permiso sa iya kag ginbutang pa sa kontrobersyal ang ila barangay nga malinong kag wala sang isyu.
Mahibaluan nga 3 sa nga ini ang taga- Isabela kag ang 2 naman tumandok sang nasambit nga lugar.
Handa naman nga maghatag sang bilog nga suporta si PB Aninang sa nagakaigo nga reklamo nga ipasaka batuk sa ila.
Mensahe sini sa iya mga pumuluyo kag may luyag nga magpadulong sa ila lugar nga indi magpahaylo-haylo kag magpati sa mga kaangay sini nga buluhaton kag hugot lamang sini nga ginapangabay nga kun tani respetuhon lamang ang tagsa-tagsa ka mga relihiyon.
