ROXAS CITY – Ginklaro ni Punong Barangay Ariel Basilonia sang Barangay Cogon, Panay Capiz, nga wala ini nagpatupa sang iya inumol sa amay sang iya SK Chairman sa baylo nga ginbuligan pa niya ini matapos nga matumba.
Ini matapos ang nagluntad nga kinagamo kadungan sang ginpatigayon nga Mayors Cap kung sa diin sa ila lugar ang napilian nga venue.
Sa interview sang Bombo Radyo kay PB Basilonia, ginpahayag sini nga sang natabo ang insidente yara ini sa likod sang mga table official nga nagatindog bangud may yara sang atleta nga na-injured.
Suno diri nga gilayon sila nagtawag sang rescue apang indi makaderitso sang sulod bangud madamo sang mga nakaparking nga motorsiklo sa guha sang covered gym.
Pahayag sang Punong Barangay nga hinali lamang nagsabat ang iloy sang SK Chairman kung sa diin nagburuka sa mga nakaparking nga motorsiklo butang nga iya man ini nga ginsabat.
Apang, nagbuya na ini sang mga malain nga tinaga nga kaangay ginapahayag indi maayo ang iya pagdumala bilang amay sang barangay kag wala sang pulos.
Mahibaluan nga subong nga adlaw, natalana ang pagpatawag sa Punong Barangay kag pamilya sang SK Chairman agud hinalaan kag mahatagan sang klaruhan ang natabo nga insidente.
