PUNTA TABUC, ROXAS CITY – Ginkumpirmar ni Punong Barangay Nestor Buenviaje nga nakalista sa Barangay Anti-Drug Abuse Council (BADAC) sang ila barangay ang lalaki nga ginluthang-patay sang ginapahayag riding in tandem sa Hermano Subd. Brgy Punta Tabuc, Roxas City.
Matandaan nga nag-angkon sang patal nga pilas sa wala nga bahin sang ulo kag dughan ang biktima nga ginkilala kay Kasmar Bacarro, 32-anyos kag residente sang Barangay Malocloc Sur, Ivisan, Capiz apang temporaryo nga nagapuyo sa nasambit nga lugar tuga sang pagpangluthang sang duha ka mga suspek nga wala pa matumod.
Sa interview sang Bombo Radyo kay PB Buenviaje, ginpahayag sini nga samtang nagakaon ang ginikanan sang live-in partner ni Bacarro may nagpanawag sa ila rason nga ginguha ini sang biktima apang lipod sa iya ihibalo nga paga-utason ang iya kabuhi sang isa sa mga riding in tandem nga suspek.
Suno pa diri nga matapos ang insidente, madasig nga nagpalagyo ang mga suspek kag gilayon man nga gindala sang pamilya sa ospital ang biktima para sa nagakaigo nga pagbulong, apang gindeklarar ini nga dead on arrival sang doctor.
Mahibaluan nga magluwas sa 7 ka mga basiyo sang .45 caliber nga armas luthang narekober sang mga kapulisan ang 1 pa ka sachet sang ginapatihan illegal nga droga.
Sa karun, padayon pa ang imbestigasyon sang mga otoridad angut sa nagluntad nga insidente kag padayon nga gina-ayam ang mga suspetsado.
