ROXAS CITY – Ginsiling ni Punong Barangay Albert Calipayan sang Barangay San Jose, kaupod ang mga opisyales nga ila sa karun ginatutukan ang mga nagakatabo nga illegal sa ila barangay.
Matandaan nga isa ang Barangay San Jose ang nakapagkit sang pila ka mga insidente sang pagkinawatay, pagduso sang illegal nga droga kag iban pa.
Sa interview sang Bombo Radyo kay PB Calipayan, ginpahayag sini nga pag-abot sa pagpahanumdum sa iya nasakupan wala ini nagakalipat subong man sa paghatag sang madasig nga aksyon.
Suno sa Punong Barangay ila sa karun nga ginatinguhaan kag ginapangitaan sang pamaagi agud amat-amat na nga matapna ang mga indi maayo nga aktibidad nga nagakatabo sa ila lugar ilabi na pag-abot sa illegal nga droga.
Isa sa mga pamaagi nga ila mas ginpasangkad sa karun amu ang pagpahamtang sang mga Barangay Tanod kada gab-i.
Mahibaluan nga may 50 nga mga Barangay Tanod ang ila lugar kung sa diin 6 sa mga ini ang nagaduty kada gab-i agud maglibot kag istekyar ang seguridad sang pumuluyo.
Samtang, ginsiling man ni Calipayan nga nagnubo na ang numero sang mga indibidwal nga yara sa ila Barangay Anti-Drug Abuse Council (BADAC) list.
