ROXAS CITY – Nagdepensa ang punong barangay sang Barangay Enseñagan, Panit-an, Capiz natuhoy sa ginpalab-ot nga reklamo sang isa ka miyembro sang Palayamanan Farmers Association sa ila barangay bangud sa iya nga pagkustodiya sang pondo sang amo nga asosasyon.
Suno kay Punong Barangay Evan Dorado, sang nagpungko ini sa pwesto, gintugyan gidman sa iya ang nabilin nga pondo sang asosasyon nga ginhatag sang Department of Labor and Employment (DOLE) para sa livelihood program sang barangay.
Apang suno diri wala sang kamatuoran ang ginpahayag ni Emily De Montanio, miyembro sang grupo, nga sa ila pondo nga kapin sa P444, 000, nagalab-ot pa sa kapin P160, 000 ang nabilin sa iya.
Ginklaro ni Dorado nga kapin sa P104, 000 na lamang ang nabilin nga pondo sang asosasyon nga yara sa iya.
Ang amo nga kantidad suno kay Dorado ang ginkompirmar pa sini sa mismo accounting office sang ila banwa.
Suno kay Dorado posible nga naakig ang grupo bangud luyag sang mga ini nga makuha ang kwarta gikan sa iya nga hugot sini nga ginapamalabagan bangud luyag sini nga mag-agi sa supplier ang kwarta bilang pagsunod sa ensakto nga proseso.
Dugang pa nga alegasyon ni Dorado nga ginagamit sang grupo ang pondo sa lending gani luyag nila nga makuha ang kwarta.// Apang sa karon plano ni Dorado nga ibalik na lamang sa DOLE ang amo nga pondo.
