PB Okpora sang Barangay Inzo Arnaldo, nagpaiway kag gintuman ang suspension order batuk sa iya apang gintawag ini nga ‘political persecution’

ROXAS CITY – Nagpanaog na sa iya nga pwesto si Punong Barangay Einstein Okpora sang Barangay Inzo Arnaldo, Roxas City.

Ini ang ginkompirmar mismo ni Okpora sang mainterview sang Bombo Radyo.

Suno kay Okpora nga nagpanaog na lamang siya sa pwesto para sa kaayuhan sang mga pumuluyo agud gilayon na nga makahulag ang konseho sang barangay para sa ila mga ginahimo nga lihok bangud sa coronavirus disease (COVID-19) pandemic.

Sa pihak sini, hugot ang pagpanindugan ni Okpora nga sala kag indi pa sang ‘enforceable’ ang suspension order nga ginpapanaog batuk sa iya bangud wala pa makabaton sang notisya ang iya nga personal lawyer natuhoy diri.

Apang ginpakamaayo ni Okpora nga temporaryo nalang anay nga magbiya sa pwesto agud indi mauntat ang mga lihok sang barangay sa kampanya kontra COVID-19.

Ginpahayag pa ni Okpora nga ‘atat’ ukon nagasako na ang iya mga kaupdanan sa konseho nga mapahalin siya sa pwesto agud sila ang makabulos.

Suno pa diri nga ‘political persecution’ ukon may lamud-pamulitika ang ginhimo sa iya sang Roxas City Council sa pagdesisyon sa reklamo batuk sa iya bangud anak ni Roxas City Vice Mayor Erwin Sicad ang 1^st Barangay Kagawad sang Barangay Inzo Arnaldo nga magatal-us sa iya kag iloy naman ni Roxas City Councilor Paul Ivan Baticados ang isa sa mga barangay kagawad nga gintawag sini nga ‘kontra-partido’.

Nagasako sila suno kay Okpora nga mag-assume sa posisyon sa pihak nga wala pa sang proper turn-over nga natabo ilabi na nga ginsuguran na sini ang pagpanagtag sang mga quarantine passes sa mga pumuluyo kag nagsugod naman ini sa mga dokumento para sa Social Amelioration Program sang Department of Social Welfare and Development (DSWD).

Ginpanindugan ni Okpora nga sa pihak nga sala kag indi sang ensakto ang pagpahalin sa iya sa pwesto, nagpaiway ini bangud sa iya pagpalangga sa mga pumuluyo.