CAPIZ – Ginsabat sang LIGA President sang Roxas City nga si Roberto Maaw Ross Roldan, ang alegasyon nga ginahaboy batuk sa iya ni Punong Barangay Manuel ‘Bongbong’ Aninang sang Barangay Olotayan, may kaangtanan sa ginapahayag pagpasulod sini sang illegal nga mga baboy sa probinsya sang Capiz.
Mahibaluan nga sang tinalikdan nga mga inadlaw, madamo nga mga insidente ang nadakpan nga may yara sang mga naga-abot nga baboy sa bahin sang Barangay Cogon sining syudad.
Sa interview sang Bombo Radyo kay PB Roldan, ginklaro sini nga wala sang kamatuuran ang ginahaboy nga mga alegasyon kag pagpasibangod batuk sa iya.
Gin-ako man sini nga matuod nga nagabyahe ini padulong sa Masbate para sa iya negosyo apang sadto pa kag sumugod nga nagpungko na ini bilang LIGA President hugot na niya ini nga ginbayaan agud tumanon kag himuon ang iya obligasyon.
Ginpahayag man ni Roldan nga may mga tion nga may nagabaligya sa iya nga mga baboy sa lugar apang wala ini makahibalo kung ini ang sakay sang baruto bangud kun mag-abot siya sa lugar wala na sini maabtan ang baruto kag ahente na lamang nga naga-transaksyon sa iya.
Matandaan nga ginsiling ni PB Aninang nga may mga tawo nga ginasugo ang LIGA President agud magdumala sang iya negosyo butang nga hugot naman ini nga ginpanginwala.
