ROXAS CITY – Wala napunggan sang punong barangay sang Barangay Milibili, sining syudad ang kaugalingon kag naghatag sang reaksyon angut sa mga ginbuy-an nga komento batuk sa iya ni anay barangay secretary Melchor Duran.
Una nga ginhatagan sabat ni Kapitan Anabelle Roxas ang akusasyon sa iya ni Duran nga butigon siya bangud sa pagpatu pato sang mga estorya.
Ginpahayag ni Roxas nga indi siya butigon nga tawo, bangud ginasugid lamang sini ang matood kag may yara ini sang ebedensiya.
Ginklaro man sang opisyal ang palahid lahid nga estorya ni Duran nga kun wala ini nagdikit ukon nag-upod sa linyada ni City Councilor Midelo Ocampo nga anay barangay kapitan sang Milibili, wala ini kuntani nag-number 1 barangay kagawad.
Suno kay Roxas nga indi dapat kwestyunon kun nangin number 1 barangay kagawad ini, bangud nagapakita lamang nga palangga siya sang mga pumuluyo kag ila nakita ang pagtuman sini sa iya nga katungdanan.
Ginbalik man sini kay Duran ang palamangkutanon nga bangud malapit ini kay Ocampo, dapat nga nagdaug ini sang nagpadalagan bilang konsehal sa ila barangay, apang kabaliktaran ang natabo, bangud napierde ini.
Ginklaro man ni Roxas nga wala siya sang handum nga matupungan ang mga nahimuan ni Councilor Ocampo bangud may yara man ini sang pamaagi agud mahimo ang iya katungdanan bilang kapitana sang barangay.
Ginaserbisyuhan sini ang mga pumuluyo sa kutob sang iya masarangan sa diin may pila na ini ka mga proyekto kag programa agud mabuligan ang ila mga kasimaryo.
