Gin-athag sang Punong Barangay sang Poblacion, Sapian, Capiz nga “first come, first serve” ang ginpatuman nga pamaagi sa pagpili sang mga estudyante nga makabaton sang tig-P20,000 sa idalom sang Bawat Barangay Makikinabang program.
Sa interview sang Bombo Radyo kay Punong Barangay Erwin Baldisimo, iya ginpahayag nga wala na nila gin-anunsyo ukon gin-post sa social media ang aplikasyon bangud limitado lamang sa lima ka estudyante ang pwede makabaton sang nasambit nga bulig pinansyal.
Dugang pa sang punong barangay, ginahandum man sang barangay nga madugangan pa ang mga makabenepisyo pinaagi sa pagtunga sang pondo, apang ginasunod nila ang mga kondisyon nga lima lamang ang pilion.
Samtang, nagpanawagan si Baldisimo sa mga estudyante kag ginikanan nga may pamangkot ukon luyag magpangayo sang klaripikasyon natuhoy sa scholarship nga magdiretso lamang sa Barangay Hall agud mahatagan sila sang nagakaigo kag opisyal nga eksplikasyon.
