Ginpaathag ni President Ferdinand Marcos Jr., kon ngaa ang pila ka importante nga mga butang lakip ang pagtaas sang sweldo, ang Anti-Political Dynasty Bill, kag iban pa nga mga isyu sa pungsod wala nalakip sa iya ikalima nga State of the Nation Address (SONA).
Sa isa ka vlog nga ginpaguwa sa iya opisyal nga Facebook page sang Sabado, Agosto 8, ginpahayag sang Presidente nga kinahanglan niya nga utdon ang mga topiko agud indi mangin malawig ang iya speech sa SONA.
Suno kay Marcos, ang kamatuoran nga wala niya ginmitlang ang nasambit nga mga isyu sa iya report sa pungsod wala nagakahulugan nga indi ini importante.
Gin-ako man sang Presidente nga may ginhimo siya nga mga pagbag-o sa iya speech, agud mangin maathag, mangin direkta, kag mahapos nga mahangpan sang publiko ang iya mensahe.
Lakip sa mga isyu nga wala ginmitlang ukon ginlakip sa iya speech amo ang ginaduso nga hagna para sa general wage increase para sa mga mamumugon.
Wala man ginmitlang ang Anti-Political Dynasty Bill bisan napasar na ini sang Kamara.
Matandaan nga naglawig sang isa ka oras kag bente singko minutos ang ika-lima nga SONA ni Marcos rason kon ngaa kinahanglan nga buhinan ang pila ka bahin sang iya pamulong-pulong para sa konsiderasyon sang tion.
