Ginkumpirma ni President Ferdinand Marcos Jr., nga adakpan na ang pugante nga si Former Ako Bicol Representative Zaldy Co, sa Prague, Czech Republic matapos nga gin-alegar nga nagsulod ini sa pungsod nga wala sang nagakaigo nga mga dokumento,.
Suno kay Marcos, yara na sa kustodiya sang mga otoridad sang Czech si Co samtang nagakoordinar ang gobyerno sang Pilipinas sa paghimo sang legal nga tikang para sa iya gilayon nga pagpauli sa pungsod.
Nagapangatubang si Co sang pila ka mga criminal case may kaangtanan sa gina-alegar korapsyon sa national budget, partikular sa mga proyekto sa imprastraktura.
Ini ang may kaangtanan man sa isa ka kumpaniya nga nakakuha sang bilyon ka pesos nga kontrata sang gobyerno, lakip na ang flood control project nga nagabalor sang P289 million sa Naujan, Oriental Mindoro nga ginapahayag substandard.
Matandaan nga nagpanago si Co humalin pa sang Hulyo 2025 matapos nabuyagyag ang ginaalegar maanomaliya sa paggasto sang pondo sang gobyerno. Sang ulihi nag-resign ini sa iya pwesto sa Kongreso matapos nga wala nagsabat sa mga panawagan nga magbalik sa pungsod.
Samtang ginpanginwala naman ni Co ang mga alegasyon batuk sa iya.
Suno sa iya, may yara sang pamahog sa iya kabuhi kag pulitika ang kaso nga ginpasaka batok sa iya.
Ginpanindugan man sini nga naghimo siya sang pila ka mga desisyon sa budget insertions base sa mandu sang Presidente.
Sa subong, wala pa sang eksakto nga petsa nga ginhatag para sa extradition ni Co bangud padayon ang legal nga proseso sa pagpauli kay Co halin sa Czech Republic.
