Ginpangunahan ni President Ferdinand Marcos Jr ang pagpanagtag sang bugas sa syudad sang Roxas, para sa mga mangunguma kag vulnerable sectors bilang kabahin sang padayon nga programa sang administrasyon sa pagbulig sa mga komunidad sa tunga sang nagataas nga presyo sang pagkaon kag gatong.
Sa aktibidad nga ginpatigayon sa covered gym sang Barangay Milibili, naglab-ot sa 500 ka mga benepisyaryo ang nakabaton sang tag 10 ka kilo nga bugas.
Sa sini nga numero, 300 ang mga mangunguma gikan sa Barangay Bolo, Bato, Bago, kag Milibili, samtang 200 naman ang gikan sa nagkalain-lain nga sektor lakip ang mga Persons with Disabilities (PWDs) kag single parents.
Kaupod naman sang Presidente si First Lady Louise Araneta-Marcos sa nasambit nga distribusyon.
Suno kay Marcos, ang ini nga tikang suno sa iya direktiba sa mga lokal government nga lubos nga magamit ang ila Local Government Support Fund (LGSF) kag mahimo nga lubos nga ma-alokar para sa distribusyon sang bugas sa ila nasakupan.
Matandaan nga nagsugod ang rice distribution program sa Manila kag natalana nga hiwaton sang anum ka beses subong nga tuig.
Ang pagpanagtag sang bugas nagapakita sang mabakod nga kaangtanan sang national an local government sa pagsabat sa mga pagpanghangkat sa ekonomiya, kag paghatag sang gilayon nga bulig sa mga komunidad.
