Ginpangunahan ni President Ferdinand Marcos Jr. ang pagpanagtag sang bugas sa Roxas City agud buligan ang mga mangunguma kag iban pa nga sektor sa tunga sang pagsaka sang presyo sang pagkaon kag langis.
Ginpatigayon ang aktibidad sa covered gym sang Barangay Milibili kun sa diin 500 ka benepisyaryo ang nakabaton sang tig-10 ka kilo sang bugas.
Sa amo nga numero, 300 ang mga mangunguma halin sa Barangay Bolo, Bato, Bago kag Milibili, samtang 200 naman ang halin sa nagkalain-lain nga sektor pareho sang persons with disabilities (PWDs) kag solo parents.
Kaupod sang Presidente si Louise Araneta-Marcos sa amu nga aktibidad.
Suno sa Presidente, ang programa ang kabahin sang iya direktiba sa mga lokal nga gobyerno nga gamiton sang husto ang Local Government Support Fund (LGSF), nga mahimo itigana para sa pagpanagtag sang bugas.
Madumduman nga nagsugod ang amu nga programa sa Manila kag ginplano nga ipatuman sang anum ka beses sini nga tuig.
Ginpahayag man sang Presidente nga may plano nga padugangan ang pondo sang LGSF basta masiguro nga magamit ini sang insakto kag epektibo.
Samtang, ang amu nga pagpanagtag nagapakita sang pagbinuligay sang national kag lokal nga gobyerno sa pagbulig sa mga pumuluyo kag pagsabat sa mga problema sa ekonomiya.
