Isa na ka layi ang Republic Act No. 12022 ukon ang Anti-Agricultural Economic Sabotage Act matapos ini nga ginpermahan ni President Ferdinand Marcos Jr.
Tinutuyo sang bag-o nga layi nga pabaskugon ang agricultural sector sa pungsod, pinaagi sa pagpugong sa mga illegal activities nga nagabalabag sa suplay sang pagkaon kag nagaresulta sa pagtaas sa presyo sang mga nagapanguna nga balaklon.
Suno kay Presidente Marcos ang nasambit nga layi ang isa ka proactive nga tikang agud malikawan ang pagsulod sang mga smuggled agricultural products, nga ginasiguro ang tama nga katungdanan kag pagpabayad sang insakto nga buwis.
Sa idalom sang hagna, pagapapanaugan sang mas mabug-at nga penalidad ang mga imbolbado sa pagpangsabotahe sa ekonomiya kasubong sang mga smugglers kag hoarders.
Magahurma man ini para sa isa ka mas mabaskog, mas nabatak nga sektor sang agrikultura nga nagaamlig sa mga mangunguma kah sa mga bumalakal.
Ginabulubanta nga P200 billion ang nagakadula nga kita sang gobyerno bangud sa economic sabotage, partikular na sa smuggling.
Ginasuspetsahan nga ang pagpangsabotahe man sa ekonomiya ang rason kun ngaa nagataas ang presyo sang mga balaklon kag nagaangkon sang shortage sa mga agricultural products.
Bangud sini, ginalauman man nga makaangkon na sang bastante kag barato nga pagkaon ang kada Pilipino nga amo ang handom ni Presidente Marcos para pungsod.
Kalakip sa mga nagtambong sa aktibidad sanday Executive Secretary Lucas Bersamin, Department of Agriculture (DA) Sec. Francisco Tiu Laurel Jr., Presidential Communications Office (PCO) Acting Secretary Cesar Chavez, Senate President Francis Escudero, Speaker Ferdinand Martin Romualdez, kag iban pa nga mga opisyal sang gobyerno.
