Wala ginasuportahan ni President Ferdinand Marcos Jr ang mga panawagan nga ideklarar si Chinese Ambassador Jing Quan nga persona non grata, sa pihak sang demanda sang pila ka mga mamalidha nga pahalinon ini sa pungsod kasunod sang mga pahayag nga ginakabig pamahog sa Pilipinas.
Suno kay Communications Undersecretary Claire Castro sang Lunes, Oktubre 19, mas gusto sang Presidente nga solbaron ang mga diplomatic issues pinaagi sa nagakaigo nga dayalogo, sa baylo nga maghimo sang agresibo nga aksyon nga mahimo makaapekto sa relasyon sa tunga sang duha ka pungsod.
Ginpahayag ni Castro nga samtang ginarespeto sang Presidente ang mga opinyon sang mga senador kag iban pa nga mga mamalidha, kinahanglan man nga ikonsiderar ang posible nga epekto sang anuman nga desisyon sa pungsod kag sa pumuluyong Pilipino.
Sa idalom sang Vienna Convention on Diplomatic Relations, mahimo ideklarar nga persona non grata ang isa ka Foreign diplomat, nga nagakahulugan nga indi na siya mabaton sang pungsod nga iya ginaserbisyuhan.
Mahimo ini magdul-ong sa pagpabalik sang diplomat sa iya pungsod kag posible nga pagbalos sang pihak nga bahin.
Suno kay Castro, nagapabilin nga malaumon ang gobyerno nga magaayo ang relasyon sang Pilipinas kag China pinaagi sa padayon nga pag-istoryahanay. Apang indi pa niya makumpirmar kun makigsapol ang Presidente kay Chinese President Xi Jinping sa nasambit nga pagbisita.
