Ginhingyo ni President Ferdinand Marcos Jr. sa gobyerno sang Canada nga himuon nga maathag kag hayag ang ila bag-o nga polisa sa migration agud mahangpan sang mga Pilipino sa Canada ang ila kahimtangan subong.
Suno sa Presidente, ginbuhinan ang quota para sa mga Pilipino Workers, kag may mga aspeto sang bag-o nga polisa nga nagapabilin nga indi klaro.
Ginpahayag niya nga wala niya ginapangabay ang Canada nga bag-uhon ang mga kasuguan, kundi luyag niya nga ang mga pagsulundan maathag nga ginhatagan kahulugan.
Ginsambit man ni Marcos nga naka-istorya niya ang mga Pilipino nga madugay na nga nagapuyo kag nagatrabaho sa Canada, gani importante nga masiguro nga indi maapektuhan ang ila status.
Dugang pa sini nga ang maathag nga mga polisa ang makabulig sa Pilipinas nga maka-adjust sa bag-o nga mga pagsulundan sang Canada.
