Nagdeklarar sang special non-working day ang Palasyo sang Malacañang sa lima ka lokalidad sa pungsod.
Sa idalom sang proclamation No. 693, wala sang klase ang Infanta, Pangasinan sa Oktubre 4 para sa ila nga 148th founding anniversary.
Base naman sa Proclamation 694, special non-working day sa Lapuyan, Zamboanga del Sur sa palaabuton nga Oktubre 16 para sa ila nga 67th founding anniversary samtang wala man sang klase sa Negros Oriental sa Oktubre 25 bangud sa Buglasan festival.
Oktubre 26 naman ang special non-working day sa Angeles city para sa ila nga Tigtigan Terakan keng dalan festival, nga kabahin sang komemorasyon sang syudad sa ila nga recovery halin sa paglupok sang Mt. Pinatubo sang 1991.
Samtang, ginahatagan man sang kahigayunan ang mga residente sang Dingle Iloilo nga magtambong sa komemorasyon sang Cry of Lincud, ukon ang una nga deklarasyon sang rebolusyon batuk sa mga Espanyol, rason nga wala man sang klase sa nasambit nga lugar sa Oktubre 28.
