Ginpahayag ni President Ferdinand “Bongbong” Marcos Jr. nga indi mabaton ang pagpangharang sang China sa medical evacuation ukon pagdala sa ospital sang isa ka nagamasakit nga sundalo nga Pilipino halin sa BRP Sierra Madre.
Suno sa Presidente, kinahanglan gid nga madala sa ospital ang nasambit nga sundalo agud makabaton sang nagakaigo nga medical assistance.
Ginpahayag man ni Marcos nga posible nga malakip ang amu nga insidente sa mga pag-istoryahanay sang Pilipinas kag China parte sa ila provisional understanding, subong man sa ginapamunuan nga kasugtanan sa Code of Conduct ukon COC sa West Philippine Sea.
Gintumod sang Presidente ang insidente bilang isa ka senyales sang nagalala nga tensyon sa West Philippine Sea.
Nagpasalamat man ang presidente sa mga kaalyado nga pungsod sang Pilipinas bangud sa padayon nga suporta sang mga ini sa tunga sang nagapadayon nga tensyon sa rehiyon.
Ginpasidunggan man sang Presidente ang mga otoridad sa padayon nga pagbulig sa mga mangingisda kag sa pagdepensa sang kinamatarong sang Pilipinas sa West Philippine Sea, bisan pa sa ginapahayag nga pagpangharass sang mga otoridad sang China.
Nagapati si Marcos nga mahimo makaapekto sa mga pag-istoryahanay sa tunga sang Pilipinas kag China ang insidente sang pagpangharang sang mga tropa sang China sa medical evacuation sang isa ka nagamasakit nga philippine army halin sa BRP Sierra Madre sang Huwebes.
Dugang pa ni Marcos, posible nga mangin bahin sang mga diskusyon ang insidente may kaangtanan sa provisional understanding sang duha ka pungsod kag sa ginapanikasugan nga Code of Conduct sa West Philippine Sea.
