Nagpanawagan si Ferdinand “Bongbong” Marcos Jr. sa mga Pilipino may yara sang paglaum, paghiliusa, kag pag-ulikid samtang ginasaulog sang pungsod ang Easter Sunday, nga nagasimbolo sang pagkabanhaw ni Hesus kag pagtapos sang Semana Santa.
Sa iya mensahe, ginpahayag sang Presidente nga nagabuylog siya sa paghiliusa sa bug-os nga mga Pilipino sa pagsaulog sang Semana Santa, nga suno sa iya amo ang “madinalag-on nga punto sang Semana Santa kag ang Diyosnon nga deklarasyon sang pagkabanhaw ni Kristo.”
Nahibaluan nga ginasaulog sang mga Filipino nga Kristiyano ang ini nga adlaw nga may madalom nga debosyon kag kalipay sa bug-os nga pungsod bilang pagdumdom sang pagkabanhaw ni Hesukristo pagkatapos sang isa ka semana nga pagpamalandong kag dedikasyon.
Gin-engganyo man sini ang tanan nga ikabuhi ang ini nga mga kabilinggan paagi sa kaayo kag kolektibo nga responsibilidad sa pagtukod sang mas malig-on kag naga-isa nga pungsod.
Ginhatagan man pagtamod ni Marcos ang handom nga matukod ang “Bag-o nga Pilipinas” sa diin ang pag-ulikid sa isigkatawo amo ang magapadayon sa paghatag sang kahulugan sa personalidad sang tagsa ka Filipino.
Dugang pa niya, sa sulod sang pila ka mga henerasyon, ang Paskwa nagapahanumdom sa aton nga ang sakripisyo wala ginausikan kag ang pag-antos amo ang umpisa sang bag-o nga paglaum.
Padayon man ang pahanumdom sini sa tagsa ka Pilipino nga magbangon nga may bag-o nga katuyuan, malig-on nga paglaum, kag madalum nga responsibilidad sa isa kag isa, kag magkabuhi sang espiritu sang Paskwa sang pagkabanhaw sa kada adlaw paagi sa pag-ulikid, gugma nga matuod, kag paghiliusa.
