Ginpasiguro ni Pangulong Ferdinand Marcos Jr. ang padayon nga suporta sang administrasyon sa modernisasyon sang Philippine Navy agud mapabakod pa ang kakayahan sang pwersa pandagat sa pagdepensa sang soberanya kag seguridad sang pungsod.
Sa iya mensahe, ginpabutyag sang Pangulo ang importansya sang isa ka moderno kag maayo nga nasangkapan nga navy agud mas epektibo nga matuman ang mandato sini sa pagpanalipod sang teritoryo kag karagatan sang Pilipinas.
Ginhatagan man sang pagkilala ni Marcos ang dedikasyon kag serbisyo sang mga miyembro sang Philippine Navy sa pag-atipan sang seguridad sang pungsod kag sa pagresponder sa mga nagkalain-lain nga mga kalamidad kag emerhensya.
Suno sa Pangulo, kabahin sang mga prayoridad sang gobyerno ang pagpadayon sang mga programa para sa pagpalambo sang kagamitan, teknolohiya, kag kapasidad sang Armed Forces of the Philippines, lakip na ang Philippine Navy.
Ginpahayag pa niya nga pinaagi sa modernisasyon, mas mangin preparado ang pwersa pandagat sa pag-atubang sang mga nagalain-lain nga hagit sa seguridad kag sa pagproteher sang interes sang Pilipinas sa mga katubigan sini.
