Suportado ni Presidente Ferdinand Marcos Jr ang proposal nga buksan sa publiko ang bicameral conference committee (BICAM) sa deliberasyon sang 2026 proposed national budget.
Suno kay Palace Press Officer Usec Claire Castro, luyag ni Presidente Ferdinand Marcos Jr nga mangin transparent ang deliberasyon kag ipakita sa mga pumuluyo nga wala gina-usikan ukon gina-abusuhan ang pundo sang publiko.
Sa SONA sang Presidente, nagpaandam ini nga handa siya nga i-veto ang ginaduso nga 2026 national budget kun may makita nga anomaliya.
Suno kay Castro, seryoso ang Presidente nga i-veto ang 2026 proposed budget kon magpadayon ang anomaliya nga pagsulod sang pondo.
Dugang pa ni Castro nga ang 2026 budget gin-obra sing maayo kag nag-agi sa maid-id nga deliberasyon kag indi joke ang paghimo sang budget para sa National Expenditure Program.
Ginhatagan punto ni Castro nga indi dapat pag-abusuhon ang poder sang purse sang Kongreso.
