Ginhatagan pagtamod ni President Ferdinand Marcos Jr nga indi dapat magpabilin nga mahinay ang promosyon sang mga manunudlo, kadungan sang pagpasalig nga wala sang educator nga magaretiro sa entry-level nga posisyon.
Ini ang sentro nga mensahe sang Presidente sa mass oath-taking sang mga bag-o promoted teachers kag school heads sa Villareal Stadium sa syudad sang Roxas, Capiz subong nga aga.
Suno kay President Marcos, madugay na nga nangin problema ang limitado nga oportunidad sa promosyon sa mga manunudlo, kon sa diin madamo ang nagakadulaan sang paglaum bangud sa kabug-at sang ila mga responsibilidad sa eskwelahan, komunidad, kag pamilya.
Ginpahayag sang Presidente nga may mga manunudlo nga indi na maka-comply sa mga requirements para sa promotion, samtang ang iban naman ang wala sang promotion positions sa ila organisasyon, kabangdanan nga nagahuna-huna sila nga maga-retiro na lang sila nga wala na-promote.
Ginpanindugan ni Marcos nga indi niya pagtugutan nga indi mabalikan ang sakripisyo sang mga manunudlo rason nga padayon nga ginapatuman sang gobyerno ang mga reporma agud mapadasig ang ila career progression.
Dugang pa sang Presidente nga ginaduso sang administrasyon ang mas maathag kag mas sistematiko nga alagyan para sa promosyon sang mga manunudlo sa idalum sang bag-o nga kasuguan, agud masiguro nga ang ila mga ikasarang, eksperyensya, kag dedikasyon sa pagserbisyo.
