Luyag ni Pangulong Ferdinand R. Marcos Jr nga mapasanyog ang mga dairy products sa pungsod. Ini matapos nga gin-inagurahan sang Presidente ang Farm Fresh Milk Plant sa San Simon, Pampanga.
Tinutuyo sini nga mapabaskog ang lokal nga industriya sang gatas, mabuhinan ang pagsalig sa mga imported nga produkto sang gatas, kag makatuga sang madamo nga trabaho para sa mga Pilipino.
Suno sa Presidente, importante ang gatas para sa ikaayong lawas, nutrisyon sang mga pamatan-on, kag sa industriya sang pagkaon.
Dugang pa sini nga ang bag-o nga planta makabulig sa pagproseso sang 32 milyones ka litro sang gatas kag 2.4 million ka litro sang yogurt kada tuig.
Ang planta isa ka proyekto sang Farm Fresh Milk Inc., isa ka subsidiary sang Malaysian dairy company nga Farm Fresh Berhad, nga may ₱312.5 million nga kapital.
Ginpamatud-an man sang Presidente ang suporta sang gobyerno para sa Dairy Industry Development Program, nga nagahatag sang kasapatan, pautang, kag paghanas sa mga mangunguma.
Ginpasalig sang Presidente nga ginasuportahan sang iya administrasyon ang dairy industry.
