ROXAS CITY – Ginalauman sang mga katapo sang Philippine Coast Guard (PCG)-Capiz, nga posible sumugod Oktubre 23 pa magaamat-amat padulong ang mga pasahero sa pantalan.
Ini ang ginpahayag ni Senior Chief Petty Officer Arnel Nisola, Deputy for Operations sang PCG-Capiz sang mainterview sang Bombo Radyo.
Suno diri, sa karon nga regular nga biyahe sang mga barko, may yara sang kapin 60 ang nagaalabutan nga mga pasahero, apang ginapanan-aw nila nga madugangan ini bangud sa magapauli nga mga Capiznon, ilabi na sa palaabuton nga malawig nga holiday break.
Nahibaluan nga may yara sang barko nga nagabiyahe adlaw-adlaw sa Culasi port, nagikan sa Batangas and vice versa.
Sa subong nga tuig, kaangay sa gihapon sang ginpatuman nga protocol pag-abot sa paglikaw sa COVID-19 ang ila igapatuman, apang indi na sa karon mangin istrikto sa vaccination card.
Pagapasangkaron man sang mga katapo sang PCG-Capiz ang ‘Oplan Ligtas biyahe’ kun sa diin magapahamtang sila sang mga passengers assistance help desk sa kada pantalan diri sa Capiz.
Panugyan sang PCG-Capiz sa mga pasahero nga magpa-book kag magpadulong sa pantalan sang temprano, agud malikawan ang pagginutok.
