ROXAS CITY – May panugyan ang Philippine Coast Guard (PCG) Capiz sa mga pumuluyo kadungan sa pagselebrar sang kapistahan ni San Juan Bautista bwas nga adlaw Hunyo 24.
Sa interview sang Bombo Radyo kay Coast Guard Senior Chief Petty Officer Arnel Nisola, Deputy Commander for Operations sang PCG-Capiz ginsiling sini nga siguraduhon nila ang siguridad sang pumuluyo kaupod ang pila ka mga katapo sang emergency team sa probinsya.
Suno kay Nisola, ang ila hanay ang naka-inline sa sini nga selebrasyon gani may pila ini ka mga pahanumdom sa tanan nga tumalambong sa amu nga kasadyahan.
Sa pagsugod sang pila ka mga aktibidad, partikular ang fluvial parade mapatigayon ang PCG Capiz sang inspeksyon sa mga baruto nga pagagamiton kag kun pila ang sarang sini nga masakay.
Magasugod ini sa atubang mismo sang bag-ong tukod nga chapel sang Barangay Baybay kag magalibot sa baybayon.
Agud malikawan ang pila ka mga disgrasya, hugot nga ginadumilian ang pagdala sang mga kabataan, magdala sang makahulubog nga ilimnon kag mga flammable materials.
Angut sini, magapahamtang man sang 37 ka mga personnel sa bilog nga syudad sang Roxas samtang 64 naman sa bug-os nga probinsya agud mapabilin ang siguridad, kaluwasan kag maselebrar ang kapistahan nga wala sang kasablagan.
Mensahe sini sa pumuluyo nga likawan nga magtambong sa lugar sa tion nga naka-inum na sang makahulubog nga ilimnon kag likawan nga magpaligo kag bantayan ang mga kabataan.
Samtang, may yara man nga ginpahamtang ang amu nga ahensya sang border sa baybayon kun sa diin kinahanglan nga indi na maglapaw ang mga nagapaligo sa amu nga lugar agud malikawan nga malumos.
