Preparado na ang mga katapo sang Philippine Coast Guard-Capiz para sa kapistahan ni San Juan Bautista sa Hunyo 24.
(NISOLA)
Sa interview sang Bombo Radyo kay Senior Chief Petty Officer Arnel Nisola, Chief Master at Arms sang Philippine Coast Guard-Capiz, iya ginpahayag maga-deploy sang mga personnel ang ila talatapan sa kadagatan nga sakop sang syudad sang Roxas kag probinsya sang Capiz.
(DAGAT)
Suno kay Nisola, maga-focus ang ila deployment sa mga baybayon kag areas nga madamo sang tawo agud mapatuman sang malinong kag luwas nga selebrasyon.
Pahayag pa niya, magapadayon ang ila pagpahamtang sang safety reminders sa publiko, ilabi na ang paglikaw sa sobra nga pag-inom sang makahulubog nga ilimnon antes magpaligo sa dagat, kag ang pagsunod sa mga safety protocols nga ipatuman sang otoridad.
Nagapanawagan man ang natungdan sang kooperasyon agud nga mapabilin nga malinong kag katawhay sang selebrasyon ni San Juan Bautista sa bug-os nga probinsya sang Capiz.
