ROXAS CITY – Wala sang may nakumpiskar nga mga kontrabando, ang katapo sang Philippine Coast Guard (PCG) Capiz kadungan sa pagsaulog sang Semana Santa.
Sa interview sang Bombo Radyo kay Acting Commander, Coast Guard CDR Edison B. Diaz sang Coast Guard Station Capiz ginsiling sini nga yara sa 254 ang mga outbound nga pasahero ukon mga naguha sa probinsya samtang 175 naman ang inbound passenger ukon mga pasahero nga nagasulod sa Capiz sadtong kwaresma.
Suno kay Diaz, halos parehas lamang ini nga numero sang mga pasahero sadtong tinalikdan nga tuig bangud kalabanan mas ginapili na nga magsakay sa roro bus.
Mahibaluan nga kadungan sa pagsaulog sang Semana Santa, nagpatigayon ang PCG Capiz sang Oplan Semana Santa kung sa diin nagpahamtang ini sang mga opisyales sa nagkalain-lain nga lugar sa probinsya partikular sa kadagatan, agud mapabilin nga maluwas sa katalagman ang mga nagapaligo ilabi na ang mga kabataan.
Pila sa mga ahensya nga nangin kaupod sang PCG amu ang katapo sang Bureau of Fire Protection (BFP), Philippine Coast Guard Auxilliary (PCGA), Philippine National Police (PNP), PNP Maritime, Emergency Response Unit (ERU), Capiz Emergency Response Team (CERT), City Health Office (CHO), Traffic Management Unit (TMU), Local Government Unit sang Baybay, Dumulog, Cogon, Punta Cogon, Talon, kag Culasi.
