Ginsiguro sang Philippine Coast Guard (PCG) nga ila pagaprotektahan ang mga mangingisda nga Pilipino sa tunga sang pagpamahog nga pag-aresto kag pagpreso sang China Coast Guard sa mga dumuluong nga trespassers sa disputed waters.
Suno kay PCG Commandant Admiral Ronnie Gil Gavan, nagtingub ang PCG, Armed Forces of the Philippines kag Bureau of Fisheries and Aquatic Resources agud maprotektahan ang mga Pilipino nga mangingisda.
Ginpalab-ot naman sang PCG ang mandato sa mga personnel sini may kaangtanan sa mga tikang nga kinahanglan himuon sa tion nga dayunon sang China ang pag-aresto sa mga mangingisda nga Pilipino.
Dugang pa sang PCG commandant, nga nag-isyu ini sang direktiba sa mga apektado nga PCG districts nga makig-angut sa mga organisasyon sang mga mangingisda sa ila lugar.
Kinahanglan suno diri nga bantayan sang PCG districts ang hulag sang mga mangingisda kag kinahanglan mag-angkon man sang
arrangements ang mga mangingisda sa Coast Guards kung sila magapadulong sa kadagatan agud mahibaluan kung sa diin sila magapadulong kag kung pananglitan nga i-harass sila sang CCG.
