ROXAS CITY – Preparado na ang mga katapo sang Philippine Coast Guard (PCG) Capiz para sa pagdagsa sang mga pasahero nga magapauli diri sa probinsya sang Capiz sa nagahilapit nga paskwa.
Ini ang ginpahayag ni Lieutenant Commander Edison Diaz, Station Commander sang PCG-CAPIZ sang mainterview sang Bombo Radyo.
Suno kay Diaz nga subong nga Paskwa may yara sila sang Oplan Biyaheng Ayos 2019 kag angut diri nagdugang sila sang mga personnel nga naka-deploy sa pier agud maga-asister sa mga pasahero nga sakay sang barko.
Nagpanugyan man ini sa publiko nga kun mahimo temprano pa nga magpabook para sa ila nga pagpauli sa probinsiya bangud limitado lamang ang passenger capacity sang mga nagabiyahe nga barko.
Ginpahanumdum man ni Diaz ang mga pasahero nga may mga bagahe nga kinahanglan sang permit kapareho sang mga pork-related products bangud tubtob subung nagapadayon man gihapon ang inspeksiyon sang PCG sini nga mga produkto kaupod ang Bureau of Quarantine sa Culasi Port.
Ginpasiguro man ni Diaz nga makita man ang presensya sang nga coastguard personnels sa baybayon nga magaserbi nga mga lifeguards para sa mga turista nga magaabot sa probinsiya.
Para sa may mga palamangkutanon suno kay Diaz mahimo sila nga magpalapit sa ila ginpahamtang nga Malasakit Help Desk ukon sa mga coastguard personnels.
