Gin-anunsyo sang Philippine Coast Guard (PCG) nga magapadala sila sang duha ka barko agud masiguro ang kaluwasan sang koalisyon sang “Atin Ito” sa ila ikatlo nga misyon sa West Philippine Sea (WPS), umpisa Mayo 26 tubtob 30, 2025.
Suno kay Commodore Jay Tarriela, tigpamaba sang PCG para sa WPS, isa ka 97-metros kag isa ka 44-metros nga barko ang ipadala agud maghatag sang seguridad, bisan pa nga ang misyon isa ka civilian-led initiative.
Ang nasambit nga lihok kasunod sang insidente sa Pag-asa Island sa diin makaduha ka beses nga ginbombahan sang Chinese Coast Guard (CCG) vessel ang BRP Datu Sanday gamit ang water cannon nga nagapatigayon lamang sang marine research.
Sa pihak sang tensyon, nagpasalig ang tigpamaba sang National Maritime Council nga si Alexander Lopez nga ila gina-engganyo ang “Atin Ito” nga padayunon ang ila misyon kag may yara sila sang contingency plans sa tion nga may problema.
Kalakip sa misyon ang isa ka peace concert nga ginhiwat sa Palawan nga ginalakipan sang mga kilala nga Pilipino kag international artists.
