Ginpabakod pa sang Philippine Coast Guard (PCG) ang ila search and rescue operations sa General Santos City kasunod sang magnitude 7.8 nga linog nga nagtay-og sa Mindanao sang Hunyo 8.
Suno sa PCG, nagdeploy sila sang 150 ka responders kag duha ka dugang nga search and rescue (SAR) dogs agud buligan ang nagapadayon nga rescue operations sa mga lugar nga grabe nga naapektuhan sang kalamidad.
Ginpadala ang tatlo ka deployable response groups kag duha ka SAR dogs sa nagrumpag nga commercial building sa Barangay Calumpang, kun sa diin ginapatihan nga may yara pa sang mga survivor nga natrap sa idalom sang mga debris.
Samtang, ginpadala naman ang duha pa ka deployable response groups kag isa ka Coast Guard High-Speed Response Boat sa Barangay Bawing para sa pagpangita sang duha ka persona nga ginreport nga wala pa mahatagan sang kasiguruhan matapos ang linog.
Padayon ang koordinasyon sang PCG sa iban nga rescue units kag lokal nga mga otoridad agud mapadasig ang search, rescue kag retrieval operations para sa mga biktima sang kalamidad.
Ginalauman sang mga otoridad nga pinaagi sa dugang nga responders kag mga K-9 units, mas mapadasig ang pagrekober kag pagsalbar sa posible pa nga mga survivor sa mga apektado nga lugar sa General Santos City.
