Target sang Philippine Coast Guard (PCG) nga mangin pinakamakusog nga coast guard sa bilog nga Southeast Asia sa lima tubtob pito ka tuig.
Mahibaluan nga ginalauman sang PCG nga maka-angkon sang dugang nga 46 ka bag-o nga barko sa mga masunod nga tuig.
Suno kay PCG Commandant, Admiral Ronnie Gil Gavan, ginaprubahan na sang administrasyon ni Marcos ang pagbakal sang lima ka 97-meter cutters nagikan sa Japan.
Magluwas diri, aprubado na ang 40-unit sang 35-meter vessel nagikan sa France.
Isa ka 60-meter cutter ang plano nga himuon sa isa ka shipyard sa Cebu.
Magluwas sa 46 nga barko para sa PCG, ginalauman man sang ahensya ang dalayon nga pagsaylo sang Bureau of Fisheries and Aquatic Resources (BFAR) kag Philippine Red Cross sa tig-isa nila nga barko padulong sa PCG.
Dugang pa sang PCG commandant, ginalauman man nga masundan pa ini nagikan sa pribado nga sektor.
Pinaagi sa suporta sang subong nga administrasyon posible nga malab-ot sini ang ginahandum nga pinakamakusog nga coast guard sa Nabagatnan-Nasidlangan sang Asya sa masunod nga tuig kag mapabilin sini ang mas malawig nga pagpatrolya sa kadagatan nga sakop sang Pilipinas.
