MANILA—Wala pa sang kumpirmasyon ang Philippine Coast Guard ukon PCG sa ginreport nga naval kag air exercise sang China sa Bajo de Masinloc ukon Scarborough Shoal sa West Philippine Sea.
Suno kay PCG spokesperson para sa West Philippine Sea Rear Admiral Jay Tarriela, isa lamang ka China Coast Guard vessel kag isa ka Chinese maritime militia vessel ang namonitor sang PCG sa ila maritime domain awareness flight sa lugar sang Sabado, nga wala sang nakita nga pagdamo sang Chinese maritime assets.
Ginpahayag ni Tarriela nga ang PCG sa subong nagasalig lamang sa mga report sang Chinese state media parte sa ginreport nga military exercise, kag posible nga may mga barko nga nag-abot sa lugar matapos ang ila pagmonitor.
Samtang, ginpahayag sang Philippine government nga ang presensya ukon ginreport nga military activities sang China sa Bajo de Masinloc indi makabag-o sa legal nga posisyon sang Pilipinas sa lugar. Sa mas temprano nga pahayag sang AFP, ginpahayag man nga ang mga military activity ukon demonstration indi makabag-o sa maritime entitlements sang Pilipinas sa idalom sang international law.
Padayon naman ang pagmonitor sang Philippine authorities sa mga aktibidad sang Chinese maritime kag naval vessels sa West Philippine Sea. Sa pinakalatest nga AFP monitoring gikan Sept. 15 tubtob 21, 35 ka Chinese naval kag coast guard vessels ang namonitor sa apat ka key features sang WPS, lakip ang 16 sa Bajo de Masinloc.
