Ginbuyagyag sang Presidential Commission on Good Government (PCGG) nga yara sa 16 nga mga salakyan ang narekober sang gobyerno nagikan sa damlag nga ginbasura nga ill-gotten wealth case batuk kay anay Pangulong Ferdinand Marcos Jr. kag asawa sini nga si anay First Lady Imelda Marcos.
Ginhimo sang PCGG ang pahayag, matapos nga ginbasura sang Sandiganbayan ang ill-gotten wealth case sa idalum sang Civil Case 0032 nga ginfile batuk sa anay first couple kag ila mga associates bangud sa kadulaan sang aksyon sang state prosecutors sa kaso nga nadelayed sang halos 4 na ka dekada.
Matandaan nga ginfile sang PCGG ang amu nga kaso sadtong Hulyo tuig 1987 batuk sa mag-asawa nga Marcos kag anay Malacañang photographer Fernando Timbol.
Kalakip sa kaso ang 21 motor vehicles kag household appliances nga nagabalor sang P5-M nga illegal nga nakuha ni Timbol nga kinahanglan mabalik sa gobyerno.
Samtang, sa ginpaguha nga statement sang ahensya ginsambit sini ang nangin desisyon sang Korte Suprema sadtong Pebrero 8, 1989 kung sa diin gindeklarar bilang ill-gotten wealth ang properties nga nakuha sang defendant nga si Timbol kag forfeited pabor sa gobyerno.
Gin-isyu man suno diri gilayon ang isa ka writ of execution nga nagasaylo sa kustodiya sang nasambit nga mga salakyan sa PCGG, rason nga madinalag-on nga narekober ang 16 nga forfeited motor vehicles.
Ginsiling man sang PCGG nga nagapabilin nga nadelayed ang proceedings sa Sandiganbayan tubtob nga magtalana suno diri ang anti-graft court sang case conference sadtong Enero 21 subong nga tuig agud himuon ini nga case closed.
Sa nasambit nga conference, wala man nagpamalabag ang PCGG kung ikonsiderar sang korte bilang case closed kag terminated bangud natuman suno diri sang komisyon ang writ of execution pinaagi sa madinalag-on nga pagturn-over sa mga property subong man nagpasugot suno diri ang Office of the Solicitor General sa pagsara kag pagtapos sang kaso.
