ROXAS CITY – Ginkompirmar sang presidente sang Philippine Councilor’s League (PCL) Capiz Chapter nga si Pilar Sangguniang Bayan Member kag Ex-Officio Board Member Mitchel John Patricio nga nakaupod sini sa PCL national congress sa Metro Manila si Patient 13, ang 45 anyos nga lalaki nga nagpositibo sa coronavirus disease (COVID-19) sa Capiz.
Suno kay Patricio, anay staff sini ang amo nga pasyente apang yara na naka-detail sa opisina sang isa ka Board Member sang probinsiya.
Ginpahayag ni Patricio nga bangud madamo sang pangilala ang amo nga pasyente, nag-volunteer ini nga mag-upod sa nasambit nga sinapol sa Metro Manila nga ginpatigayon sadtong Pebrero 26 tubtob 28, 2020.
Aminado man si Patricio nga kaupod niya sa isa ka hulot sa hotel ang amo nga pasyente apang sadtong nga tinion, wala pa ini sang ginabatyag nga mga sintomas.
Ginpahayag pa ni Patricio nga sadtong Pebrero 28 siya nagpauli sa Capiz kag nagpabilin pa sa Metro Manila ang amo nga pasyente kag Marso 2 na ini nakapauli.
Kun isipon ang mga inadlaw humalin sang katapusan sila nga nag-updanay, ginpahayag ni Patricio nga nag-lapse na ang 14 diyas nga incubation period kag wala siya sang may ginabatyag nga anuman nga sintomas sang COVID-19.
Padayon man nga gina-usisa ni Patricio ang mga nakaupod sini nga konsehales sang Capiz sa amo nga sinapol kag suno diri, wala man sa ila ang naglain ang pamatyag humalin sang sila ang nagbulagay.
Apang para sa katawhayan sang tanan suno kay Patricio, padayon sa gihapon sini nga ginapaidalom sa self quarantine ang iya nga kaugalingon.
Nag-apelar man ini sa publiko nga indi pag-husgaran kag basulon ang nasambit nga pasyente bangud indi man sini kagustuhan nga malatnan sang amo nga balatian.
Nagpanawagan man ini nga kun mahimo dulaon na ang ‘stigma’ sa ila nga mga nagtambong sa amo nga sinapol bangud lunsay yara man sa maayo nga kondisyon ang ila nga ikaayong-lawas.
