ROXAS CITY – Nagapati ang presidente sang Philippine Councilor’s League (PCL) Capiz Chapter nga si Pilar Sangguniang Bayan Member kag Ex-Officio Board Member Mitchel John Patricio nga malayo nga malatnan ini kag ang iya mga kaupdanan nga mga konsehal sang coronavirus disease kasunod sang ila pagtambong sa isa ka sinapol sa Metro Manila.
Ini sa pihak nga nakompirmar gikan sa Department of Health nga isa ka konsehal gikan sa Dumaguete City, Negros Oriental nga nagtambong sa amo nga sinapol ang nagpositibo sa nasambit nga balatian.
Suno kay Patricio nga tatlo ka adlaw ang ila gintambungan nga sinapol humalin Pebrero 26 tubtob 28, 2020.
Ginpahayag sini nga naglapaw naman ang 7 tubtob 13 ka adlaw nga incubation period sang nasambit nga virus kag sa iya pagpanalawsaw sa mga kaupod nga konsehal, wala man sang nakaangkon sang sintomas sang nasambit nga balatian.
Posible man suno kay Patricio nga naangkon sang konsehal gikan sa Negros Oriental ang amo nga balatian sang natapos na ang ila nga sinapol nga gintambungan.
Ini bangud matapos ang ila sinapol, nagpadulong pa ang amo nga konsehal sa Greenhills kun sa diin may nakasakay ini nga indibidwal nga gikan sa pungsod Macau.// Kasunod sini, nagpanawagan si Patricio sa publiko nga magpabilin nga kalmado kag positibo nga malampuwasan sang pungsod ang gina-eksperyensiyahan sa karon nga pamahog sang COVID-19.
