Ginduso sang Philippine Drug Enforcement Agency-Capiz ang pagpatuman sang drug clearing operations sa Capiz Rehabilitation Center agud masiguro nga drug-free ang pasilidad.
Ini kasunod sang pagrekober sang ilegal nga droga sa isa ka Person Deprived of Liberty (PDL) sa sulod sang amo nga pasilidad.
Sa interview sang Bombo Radyo kay Mr. Jury G. Rocamora, Investigation Agent V, sang Philippine Drug Enforcement Agency, Capiz Provincial Office, iya ginpahayag nga kinahanglan nga ipatuman ang Drug Clearing Operations for Controlled Facilities nga ginakalakipan sang random drug testing sa mga empleyado kag mga PDL, regular nga search operations, kag surprise inspections agud matapna ang pagsulod sang ilegal nga droga sa pasilidad.
Suno kay Rocamora, importante ang padayon nga implementasyon sang sini nga mga tikang agud mapabilin nga luwas kag drug-free ang Capiz Rehabilitation Center.
Nagpanawagan man ini sa publiko nga magkooperar kag magsuporta sa kampanya batok sa ilegal nga droga pinaagi sa pagreport sang nagkalain-lain nga ilegal nga mga aktibidad.
