ROXAS CITY, CAPIZ—Ginapabakod sang Philippine Drug Enforcement Agency (PDEA) Capiz kag Provincial Government ang ila koordinasyon sa kampanya batok iligal nga droga, matapos maghinun-anon ang duha ka panig nahanungod sa pagpangita sang angay nga lugar ukon lote para sa permanente nga Provincial Office sang ahensya.
Sa interview sang Bombo Radyo kay PDEA Capiz Investigation Agent V kag Provincial Officer Jury F. Rocamora, ginpahayag sini nga isa ka importante nga tikang ang pag-angkon sang permanente nga lugar para sa PDEA Capiz agud mas mapalapad pa ang ila operasyon kag serbisyo sa probinsya.
Nahibaluan nga ginhiwat ang paghinun-anon sang Agosto 28, 2026 sa talatapan ni Governor Fredenil H. Castro sa Capiz Provincial Capitol. Ginhisgutan diri ang posibilidad sang paghatag sang Provincial Government sang lugar nga sarang mag-akomodar sang provincial office sang PDEA.
Suno kay Rocamora, ang pagkabaton sang permanente kag mas angay nga opisina makabulig sa ahensya nga mangin mas organisado kag episyente sa pagtuman sang ila mandato, ilabi na sa pagpatuman sang mga operasyon kag programa batok sa paglapta sang iligal nga droga sa Capiz.
Ginalauman man nga ang mas maayo nga pasilidad kag lokasyon sang opisina makabulig sa mas hapos nga koordinasyon sang PDEA sa mga lokal nga panguluhan kag iban pa nga ahensya sang gobyerno. Ini agud mas mapabakod ang pagbinuligay sa pag-atubang sang problema sa iligal nga droga.
Kaupod ni Governor Castro sa paghinun-anon ang mga opisyal sang PDEA, lakip sanday Deputy Director General for Operations Assistant Secretary Renato Gumban, Regional Director Ralph Rommel Torres, PDEA Capiz Provincial Officer Jury Rocamora, Assistant Provincial Officer Dennis Parreñas, kag Barangay Drug Clearing Officer Nemae Trinidad.
Samtang padayon ang pagtan-aw sa angay nga lugar para sa permanente nga opisina, ginapabutyag sang PDEA kag Provincial Government ang kahinanglanon sang padayon nga koordinasyon kag suporta. Pinaagi sini, ginapaabot nga mas mapabakod pa ang kampanya kontra iligal nga droga kag ang pagpatuman sang mga programa para sa kalinong, seguridad kag kaayuhan sang mga Capisnon.
