Ginsiguro sang Philippine Drug Enforcement Agency-Capiz nga mangin transparent ang pagpatuman sang mandatory surprised drug test sa mga government official sa probinsya sang Capiz.
Sa interview sang Bombo Radyo kay Investigation Agent V Jury Rocamora sang Philippine Drug Enforcement Agency-Capiz, iya ginpahayag nga ang ini nga tikang ang igapatigayon kaupod ang Department of the Interior and Local Government (DILG) agud masiguro nga drug-free ang tagsa ka talatapan sang gobyerno.
Suno kay Rocamora, magapakig-angot man sila sa mga local government unit sang probinsya angut sa mangin intervention kaangay sang rehabilitation sa tion nga may yara sang magpositibo.
Pahayag pa niya, isa ka daku ka pagpanghangkat ang pag-engganyo sa tanan nga magsunod sa amo nga direktiba apang daku ang pagpasalamat sini sa mga opisyal nga pabor kag bug-os ang pagsuporta.
Nagalaum man ang natungdan nga mangin matalunsay kag madinalag-on ang nasambit nga mandatory surprised drug test nga possible nga magtuga man sang pagnubo sang drug-related incidents sa probinsya sang Capiz.
